Kva er Digitaliseringsdirektoratet?

Digitaliseringsdirektoratet har Digitaliserings- og forvaltningsdepartementet som overordna fagdepartement.

Regjeringa har ein ambisjon om at offentleg sektor i Noreg skal vere verdsleiande på digitalisering. Det skal mellom anna skje gjennom fellessatsingar og tenester for å skape ein felles digital offentleg sektor. Det inneber at staten, kommunane og heile forvaltningsapparatet skal samarbeide med næringslivet og frivillige organisasjonar, slik at vi – saman – kan utnytte det moglegheitene digitalisering gir oss og kan skape.

Teknologi – og menneske

Digdir si rolle er å trekke utviklinga i den retninga som tener fellesskapet best. Digdir skal også sørge for at Norge handterer utfordringane digitalisering kan medføre, til dømes på informasjonssikkerheit og personvern. Og ikkje minst: Digitalisering handlar ikkje berre om teknologi, men minst like mykje om menneska teknologien skal fungere for.

Innbakt i regjeringa og KS sin ambisjon i digitaliseringsstrategien for offentleg sektor (Én digital offentlig sektor) ligg det derfor ein klar marsjordre til Digdir om å legge til rette for og skape gode møte mellom teknologien og menneska, anten dei er innbyggarar, frå næringslivet eller representerer ein frivillig organisasjon.

Samfunnsoppdrag og visjon

Samfunnsoppdraget til Digdir er å vere regjering sitt fremste verktøy for raskare og meir samordna digitalisering av samfunnet – sjølvsagt i tett samarbeid med mange andre aktørar i både offentleg og privat sektor.

Alt dette ligg i Digdir sin visjon: Saman for ein enklare digital kvardag.

Hovudfunksjonar

Digitaliseringsdirektoratet har følgande hovudfunksjonar:

• bidra til utvikling og gjennomføring av regjeringa sin ikt-politikk
• premissgivar for digitalisering og heilskapleg informasjonsforvaltning
• premissgivar for innovasjon i offentleg sektor og eit særleg ansvar som tilretteleggar for godt samspel mellom aktørane på feltet
• koordinering av tverrgåande digitaliseringstiltak
• strategisk planlegging og vidareutvikling av ein heilskapleg digital infrastruktur for offentleg sektor
• samordnar og pådrivar i offentleg sektor sitt arbeid med førebyggande informasjonssikkerheit
• fremje klart språk i offentleg sektor
• utvikling av digitale tenester for innbyggarar, kommunar og næringsliv
• drift, forvaltning og videreutvikling av felleskomponentar og fellesløysingar
• tilsyn for universell utforming av ikt

I Brønnøysund, Leikanger og Oslo

Digitaliseringsdirektoratet har om lag 330 tilsette fordelt på våre kontor i Brønnøysund, Leikanger og Oslo. Digitaliseringsdirektoratet har fire fagavdelingar, to stabs- og støtteavdelingar og eit tilsyn for universell utforming av ikt som har ei særskilt uavhengig rolle.